‘Lid’ en ‘gien lid’

Zo bin-k in de loop van al die jaor’n al op hiel wat voetbalcomplexen ewest. Bij veule clubs al menig keer, bi’j sommige clubs nog mar één keer. Det hangt af van de competitie-indeling en de klasse waorin et team speult. En elke accommodatie is weer aanders.

Vanof et veurige seizoen gao-k mit in de supportersbusse naor de uutwedstried’n. De jaor’n daorveur gong ik saem’n mit dree medesupporters in de auto daor naor toe. Veur et vervoer reed een ieder van oes ums de beurte mit zien eigen auto. Zo kump et ook veur det ik soms wat meemaeke op et veld of langs de lijn of iets aanders wat mi’j opvalt, det mi’j nog lange blef heug’n. Een z’n geval za-k hier ies beschriev’n. 

Et zal now ongeveer een jaor of vieftiene eleed’n wêen det wi’j mit oes groepien van veere in Groningen waren, ik bedoele dus de stad, veur de uutwedstried’n teeg’n de studentenvoetbalvereniging ‘The Knickerbockers’ en det sprêke ie uut as ‘De ‘Nikkerbok-kers’. Et was de eerste keer det oes cluppie in Groningen teeg’n de studenten mus voetballen, dus wi’ j waren daor nog niet eerder ewest. Now go-w miestal veur en ook in de pauze van de wedstried in de kantine van de teeg’npartij een koppie koffie drink’n. Zo deden wi’j det disse keer ook. Et was gien groot clubgebouw en zodoende was de kantine ook niet groot. Terwijl in aandere clubgebouwen oaver et algemeen de toegang naor de toiletten giet via de hal, viel et mi’j op det hier de toiletten direct naost de kantine waren en via twee deuren te bereiken waren vanof de kantine. Det zag ik an et opschrift op die deuren. Op de ene deur stund ‘lid’ en op de aandere deure stund ‘geen lid’. Toen ik dat zo laze, dacht ik : “Det ies toch grappig en echt wat veur studenten um zo et verschil tussen de heren- en damestoiletten an te geven.

En ik viene et ielemaole komisch det a-j as bezuuker van de teeg’npartij van The Knickerbockers daor koomt en gebruuk wilt maek’n van de w.c., as meinse van et mannelijk geslacht, umme mar bi’j mi’jzelf te bliev’n, mut kiezen veur de deure mit et opschrift ‘lid’, terwijl ie toch gien lid bint van die vereniging…….

Ie mut de humor d’r mar van inzien.